Kursk viloyatida 200 dan ortiq odam bedarak yoʻqoldi

Kursk viloyati aholisi Ukraina qoʻshinlari va Rossiya armiyasi oʻrtasidagi janglar zonasida joylashgan aholi punktlarida bedarak yoʻqolgan qarindoshlarini qidirmoqda. "Lisa Alert" qidiruv guruhiga kamida 200 kishi murojaat qildi, «VKontakte» ijtimoiy tarmogʻida ham bedarak yoʻqolgan qarindoshlari haqida boshqa xabarlar paydo boʻldi, deb yozadi «Agentstvo».

Kursk viloyatidagi "Lisa Alert" mintaqaviy idorasi devorida Sudjanskiy va Korenevskiy tumanlari, shuningdek, Kurskning oʻzidan jangovar zonada boʻlgan, ammo aloqani toʻxtatgan odamlarni qidirish toʻgʻrisida 71 ta eʻʻlon osib qoʻyilgan, tashkilotning oʻziga yuborilgan soʻrovlar soni ham ancha koʻp.

“Biz aniq raqam aytishga tayyor emasmiz, chunki hozircha statistik maʻʻlumotlar yoʻq, biroq soʻnggi ikki-uch kun ichida 200 ta soʻrovga ishonch bilan yaqinlashdik”, — dedi tashkilotning hududiy boʻlimi matbuot kotibi Olesya Partalyuk. Uning soʻzlariga koʻra, "Lisa Alert" qidiruv eʻʻlonlarini faqat qarindoshlari yordam soʻragan odamlar uchun eʻʻlon qiladi. “Barcha yoʻqolganlar haqida bilamiz deb ayta olmayman. Oʻylaymanki, ularning soni ancha koʻp", - deya taʻʻkidladi u.

Shuningdek, “VKontakte” ijtimoiy tarmogʻidagi mahalliy guruhlar orqali ham bedarak yoʻqolgan aholi qidirmoqda. Shunday qilib, oʻtgan juma oqshomidan boshlab faqatgina “Podslushano Sudja" (“Sudja eshitdi") guruhi foydalanuvchilari 148 kishini qidirish haqida xabarlarni nashr etishdi. Yaqinlari va tanishlarini topishda yordam soʻragan xabarlar 7 avgust, chorshanba kuni — Ukraina Qurolli kuchlari hujumi boshlanganidan keyingi ikkinchi kunidan paydo boʻla boshladi.

Oʻtgan juma kuni Kursk viloyatining Sudjanskiy tumani aholisi Ukraina armiyasining davom etayotgan hujumi fonida prezident Vladimir Putindan yordam soʻradi. Videomurojaatda ular “bolalar bilan, boshpanasiz, toʻlovlar va pulsiz qolishganini” taʻʻkidlagan.

Bir kun avval Rossiya Milliy aksilterror qoʻmitasi (MAK) Ukrainaning davom etayotgan hujumi munosabati bilan chegaradosh uchta viloyatda “aksilterror operatsiyasi” rejimi joriy etilganini eʻʻlon qildi.

“2024 yil 9 avgustdan Belgorod, Bryansk va Kursk viloyatlarida aksilterror operatsiyalarini tashkil etish toʻgʻrisida qaror qabul qilindi”, — deyiladi MAK xabarida.

Ukraina qurolli kuchlari 6 avgust kuni ertalab Rossiyaning chegaradosh Kursk viloyatiga hujumlarini boshladi. Bir necha kunlik janglarda Ukraina armiyasi kamida 20 ta aholi punkti hamda Rossiya gazi Evropaga uzatiladigan “Sudja” gaz oʻlchash stantsiyasini nazorati ostiga oldi. Oʻnlab rossiyalik harbiylar, jumladan muddatli harbiy xizmatchilar asirga tushgan. Ukraina prezidenti devoni rahbari maslahatchisi Mixail Podolyakning aytishicha, Rossiya hududi, odamlari va texnikasini yoʻqotadigan ushbu operatsiya Kievning Moskva bilan boʻlajak muzokaralardagi pozitsiyasini mustahkamlaydi.

Qayd etilishicha, Rossiya razvedkasi Ukrainaning Kursk viloyatiga amalga oshirishni rejalashtirayotgan bosqinini ikki hafta oldin bilgan, biroq mamlakat harbiy rahbariyati, jumladan, Gerasimov bu maʻʻlumotni eʻʻtiborsiz qoldirgan, deb xabar qildi Bloomberg Kremldagi manbaga tayanib.

 Rasmiy maʻʻlumotlarga koʻra, mintaqadagi janglar natijasida kamida 66 kishi, jumladan, toʻqqiz nafar bola jarohatlangan. Vitse-gubernator Andrey Belostotskiy toʻrtta oʻlim haqida maʻʻlum qildi.

Mavzuga aloqador

Eng ko‘p o‘qilgan

Tavsiya qilingan