Turkiya Isroil bilan savdo aloqalarini qayta tiklashi mumkin

Gʻazoda erishilgan tinchlik «doimiy» boʻlsa, Turkiya Isroil bilan savdo aloqalarini qayta tiklashi mumkin. Bu haqda seshanba kuni Tashqi iqtisodiy aloqalar kengashi (DEİK) rahbari Nail Olpak maʻʻlum qildi.

2024 yil 3 may kuni Turkiya Gʻazo sektoridagi harbiy harakatlar va insonparvarlik yordamining toʻsib qoʻyilishi sababli Isroil bilan barcha savdo aloqalarini toʻxtatgan edi. Bu qarorga koʻra, Turkiya oʻz mahsulotlarining Isroilga eksportini va Isroil mahsulotlarining import qilinishini toʻliq toʻxtatdi. 2023 yilda ikki mamlakat oʻrtasidagi oʻzaro tovar ayirboshlash hajmi qariyb 7 milliard AQSh dollarini tashkil etgan boʻlib, buning 76 foizi Turkiya eksporti hissasiga toʻgʻri kelgan.

Eslatib oʻtamiz, yakshanba kuni Isroil va HAMAS oʻrtasida oʻt ochishni toʻxtatish kelishuvi kuchga kirdi va mahbuslar almashinuvi boshlandi. Gʻazo sektoridagi urush paytida Rajab Toyyib Erdoʻgʻon Isroilga qarshi koʻplab bayonotlar berdi va hatto sionizmga qarshi islom olamini birlashtirishga harakat qildi. Koʻplab davlatlar Isroilning urush jinoyatlari ortidan u bilan iqtisodiy va siyosiy aloqalarini uzdi va Janubiy Afrikaning Gʻazo sektorida Falastin xalqining genotsidi uchun Xalqaro Suddagi ishiga qoʻshildi.