«Termiz xalqaro savdo markazi» erkin savdo zonasida vizasiz rejim joriy etiladi. Shuningdek, Afgʻoniston va Pokiston fuqarolariga hudud ichida doʻkon va binolar sotib olishga ruxsat berildi. Savdoda soʻm bilan birga dollar, rublʻ, evro va yuanʻ valyutalarini qabul qilishga ruxsat beriladi.

Shavkat Mirziyoev «Termiz xalqaro savdo markazi» erkin savdo zonasi rivojlantirish boʻyicha yangi chora-tadbirlarni tasdiqladi. Farmon Lex.uz'da eʻʻlon qilindi.

Farmon bilan markaz hududida faoliyat yurituvchi Oʻzbekistonda roʻyxatga olingan tadbirkorlik subʻʻektlariga Afgʻoniston fuqarolari, chet el fuqarolari va fuqaroligi boʻlmagan shaxslarni mehnat faoliyatini amalga oshirish huquqi uchun tasdiqnoma olmasdan mehnat shartnomalari asosida ishga qabul qilishga ruxsat beriladi.

Afgʻoniston va Pokiston fuqarolariga savdo doʻkonlari, xizmat koʻrsatish va ishlab chiqarish uchun moʻljallangan bino va inshootlarni ijaraga olish, shuningdek, istisno tariqasida, mulk huquqi bilan sotib olish huquqi beriladi. Bunda er uchastkasiga boʻlgan huquq qonunchilikda belgilangan tartibda ijara huquqi asosida davlat roʻyxatidan oʻtkaziladi.

Shu bilan birga, ulgurji va chakana savdoda toʻlov vositasi sifatida, istisno tariqasida, oʻzbek soʻmi bilan bir vaqtda AQSh dollari, Rossiya rubli, evro, yuanʻ valyutalarini qabul qilishga ruxsat beriladi. Bunda qabul qilingan naqd xorijiy valyuta Markazda tashkil etilgan tijorat banklari filiallari orqali Markazda faoliyat yuritadigan yuridik shaxslarning hisobvaraqlariga oʻtkaziladi;

Markaz hududida tashkil etiladigan zamonaviy tibbiyot klinikasida Afgʻoniston fuqarolariga tibbiy xizmatlar koʻrsatiladi hamda ushbu klinikada davolash imkoni boʻlmagan ogʻir turdagi kasalliklarga chalingan bemorlarga respublika hududida joylashgan davlat va nodavlat tibbiyot muassasalarida davolanish uchun tibbiy kirish vizalari olish uchun yoʻllanma beriladi.

Oʻzbekiston fuqarolari, chet el fuqarolari, shuningdek, fuqaroligi boʻlmagan shaxslar markaz hududiga shaxsini tasdiqlovchi hujjat asosida nazorat-oʻtkazish punktlarida belgilangan tartibda tekshiruvdan oʻtkazilgandan soʻng kiritiladi hamda ularga markaz hududida tashkil etilgan barcha xizmatlardan foydalanish imkoniyati yaratiladi.

Chet el fuqarolari va fuqaroligi boʻlmagan shaxslarning Oʻzbekiston Respublikasiga kirish vizasini rasmiylashtirmasdan, chegara va bojxona nazoratidan oʻtgan holda maxsus yoʻlak orqali kirishi (chiqishi) hamda oʻn besh kun muddatgacha markaz hududida boʻlishi tartibi joriy etiladi.

Savdo doʻkonlari, xizmat koʻrsatish va ishlab chiqarish uchun moʻljallangan bino va inshootlarni olgan, shuningdek, shartnoma asosida ishlash, taʻʻlim muassasalarida oʻqish, bank filiallarida faoliyat yuritish, savdo-sotiq va boshqa faoliyat turi bilan shugʻullanish maqsadida tashrif buyurayotgan mamlakatda oʻn besh kundan ortiq muddat boʻlishni rejalashtirgan chet el fuqarolari va fuqaroligi boʻlmagan shaxslar Oʻzbekistonga kirish vizasini rasmiylashtirgan holda kirib kelishlari talab etiladi.

Yangi tartibga muvofiq markaz hududida:

·        sotib olingan tovarlar boʻyicha qoʻshilgan qiymat soligʻini qaytarish (Tax free) qoidalari qoʻllanmaydi; xarid qilingan tovarlar Oʻzbekiston Respublikasi hududiga belgilangan tartibda bojxona toʻlovlari toʻlangandan soʻng olib kiriladi. Bunda bojsiz olib kirish normalari tatbiq etilmaydi;

·        joylashgan obʻʻektlarni boshqarish, ekspluatatsiya qilish, ijaraga berish va sotish «Termez International Trade Centre» MChJ tomonidan amalga oshiriladi;

·        jamoat tartibini saqlash, sodir etilgan huquqbuzarliklar boʻyicha surishtiruv va tergov tadbirlarini oʻtkazish qonunchilik hujjatlariga muvofiq belgilangan tartibda amalga oshiriladi.

Iqtisodiyot va moliya vazirligi, Surxondaryo viloyati hokimligi, Investitsiyalar, sanoat va savdo vazirligi, Tiklanish va taraqqiyot jamgʻarmasi hamda «Surxon sanoat taʻʻminot» MChJning quyidagi takliflari maʻʻqullanadi:

·        Markaz hududidagi bino va inshootlarni mulkiy majmua sifatida «Termez International Trade Centre» MChJga sotish;

·        «Termiz xalqaro savdo markazi» erkin savdo zonasi direktsiyasi davlat unitar korxonasini belgilangan tartibda tugatish.

Tiklanish va taraqqiyot jamgʻarmasi, Surxondaryo viloyati hokimligi va «Termez International Trade Centre» MChJning Surxondaryo viloyati hokimligiga Tiklanish va taraqqiyot jamgʻarmasi mablagʻlari hisobidan Termiz xalqaro savdo markazi obʻʻektlari qurilishiga ajratilgan 20 mln AQSh dollari miqdoridagi kredit mablagʻlarini qaytarish majburiyatini «Termez International Trade Centre» MChJga oʻtkazish hamda kreditning toʻlov muddatini 2028 yil 31 dekabrga qadar uzaytiriladi.

Markaz hududida biznes maktabini tashkil etish koʻzda tutilgan. Afgʻonistonning Mozori Sharif shahridan markaz hududigacha (95 km) ekspress avtobus qatnovini yoʻlga qoʻyiladi.