Oʻzbekiston tergov vaqtidagi qiynoqlarning oldini olish choralari kuchaytirilmoqda

 

Oʻzbekiston Qonunchilik palatasi deputatlari jinoyat ishini yuritish chogʻida shaxsni qiynoqqa solish holatlarining oldini olishga qaratilgan qonun loyihasini qabul qildi. Hujjatga koʻra, shaxsni tergov hibsxonasiga joylashtirishdan oldin uni tergov hibsxonasining oʻzida majburiy tibbiy koʻrikdan oʻtkazish tartibi belgilanmoqda.

Oʻzbekiston Oliy Majlis Qonunchilik palatasining 21 yanvarʻ kuni boʻlib oʻtgan navbatdagi majlisida jinoyat ishini yuritish chogʻida shaxsni qiynoqqa solish holatlarining oldini olishga qaratilgan qonun loyihasi koʻrib chiqildi.

Qonun loyihasi bilan «Jinoyat ishini yuritish chogʻida qamoqda saqlash toʻgʻrisida»gi qonunga tegishli qoʻshimchalar kiritish orqali, shaxsni tergov hibsxonasiga joylashtirishdan oldin uni tergov hibsxonasining oʻzida, hibsxonaga kelganidan boshlab 2 soat ichida majburiy tibbiy koʻrikdan oʻtkazish tartibi belgilanmoqda.

Tibbiy koʻrik davomida shaxsning tanasida jarohat va shikastlanishlar aniqlangan taqdirda zudlik bilan prokurorga xabar berilishi tartibi oʻrnatilmoqda.

Qonun loyihasi deputatlar tomonidan ikkinchi va uchinchi oʻqishda qabul qilinib, Senatga yuborildi.