Suriyada isyon: Latakiya va boshqa shaharlarda keskin toʻqnashuvlar, shialar ham aralashdi

Suriyada isyon: Latakiya va boshqa shaharlarda keskin toʻqnashuvlar, shialar ham aralashdi

Kecha, 6 mart kuni, Suriyaning Latakiya, Xoms, Halab va Jabla shaharlarida davlat xavfsizlik kuchlari va sobiq rejim tarafdorlari oʻrtasida keskin toʻqnashuvlar sodir boʻldi. Bir kecha ichida Suriya xavfsizlik kuchlaridan kamida 30 kishi halok boʻlgani haqida xabar berilmoqda. Isyonga shialar ham aralashib, jangovar harakatlarda ishtirok etgan.

Isyon va toʻqnashuvlar

Tungi hodisalar Latakiyaning Beyt Ana qishlogʻida sobiq rejim tarafdorlari xavfsizlik kuchlariga hujum qilishi bilan boshlangan. Keyinroq, Jabladagi Hmeymim aeroporti va Dengiz akademiyasi hududlarida katta toʻqnashuvlar sodir boʻldi. Hukumat kuchlari mazkur hududlarga zirhli texnika va qoʻshimcha harbiy boʻlinmalarni yuborgan.

Halab, Xoms va Idlib shaharlarida ham keng koʻlamli norozilik namoyishlari kuzatilgan. Minglab odamlar shahar maydonlarida sobiq rejim tarafdorlarining hujumlariga qarshi namoyishlar oʻtkazgan.

Shialarning roli va ishtiroki

Tartus shahrida xavfsizlik kuchlari shialardan iborat jangarilar guruhini qoʻlga olgan. Bu guruh sobiq rejim tarafdorlarini qoʻllab-quvvatlab, isyonga yordam bergani aytilmoqda. Latakiyadagi toqnashuvlarda shialar faol ishtirok etib, ularning bir qismi jangovar harakatlarda qatnashgan.

Suriya xavfsizlik kuchlari Gʻiyos Sulaymon nomli shia komandirini qoʻlga olgan. Bir necha kun oldin u “Suriyani ozod qilish harbiy kengashi” nomli guruh tuzgani haqida xabarlar tarqalgan edi. Suleymon Jabla va Tartus shaharlarida shialar tomonidan qoʻzgʻatilgan isyonni boshqargan.

Suriya hukumati va harbiy choralar

Suriya mudofaa vazirligi rasmiy bayonot berib, isyonchilarga taslim boʻlishni talab qildi:
"Siz togʻlarda tarqalib ketdingiz va boshpanangiz yoʻq. Qoʻlingizda faqat bitta tanlov bor – qurolni tashlash va adolat oldida javob berish."

Suriya armiyasi Latakiya va boshqa isyon koʻtarilgan hududlarga 15 000 askar va politsiya kuchlarini yuborgan. Shuningdek, Jarablus, Azaz, Afrin, Manbij va Idlibdan qoʻshimcha boʻlinmalar jalb qilingan.

Turkiyaning aralashuvi

Shuningdek, Turkiya qurolli kuchlari Idlibga katta harbiy konvoy joʻnatgani haqida xabar berilmoqda. Turkiya aviatsiyasi shimoliy Suriyadagi PKK/YPG manzillariga havo zarbalari bergan. Kamishlida bir nechta strategik obъektlarga ham zarbalar berilgan.

Isyon va javob choralari

Suriya Islomiy Kengashi sobiq rejim tarafdorlariga qarshi kurashni har bir musulmon uchun burch deb eъlon qildi. Barcha suriyaliklar davlatni qoʻllab-quvvatlashga chaqirildi. Juma kuni mamlakat boʻylab namoyishlar va norozilik aktsiyalari tashkil etilishi kutilmoqda.

Bir kecha ichida yuz bergan keskin voqealar Suriyada yangi nizolarning boshlanishidan darak berayotgan boʻlishi mumkin. Hukumat xavfsizlikni taъminlashga uringan bir paytda, isyonchilar va shialarning harakatlari hali ham davom etmoqda.