Suriyada Asad tarafdorlariga qarshi harbiy amaliyotlar davom etmoqda

Suriyaning Latakiya viloyatida xavfsizlik kuchlariga hujum uyushtirilganidan soʻng, Bashar Asad rejimining  sobiq harbiylarini qidirish va tozalash operatsiyalari kengaymoqda.

Suriya armiyasi Latakiya va Tartus viloyatlariga yuzlab harbiy texnika, jumladan, tanklar, bronetransporterlar va reaktiv yalpi oʻqotar tizimlaridan iborat qoʻshimcha kuchlarni yoʻlladi.

Suriyaning davlat axborot agentligi SANA maъlumotiga koʻra, Asad rejimi agʻdarilganidan keyingi sobiq harbiylarni qoʻlga olish maqsadida hududda keng qamrovli operatsiyalar olib borilmoqda. Shu bilan birga, qurollarni topshirishni xohlaganlarga yaqin xavfsizlik punktiga ixtiyoriy ravishda kelish taklif qilinmoqda.

Toʻqnashuvlar davom etmoqda, kamida 50 kishi halok boʻldi

Suriya armiyasi Latakiyaning Jabla tumanidagi nuqtalarga artilleriya va tanklarini joʻnatgan holda, agʻdarilgan rejim kuchlari bilan toʻqnashuvlarni davom ettirmoqda.

Latakiyaning Kirdaha hududida ham otishmalar toʻxtamayapti.

«Anadolu» agentligining harbiy manbalaridan olingan maъlumotlarga koʻra, ikki kundan beri davom etayotgan toʻqnashuvlarda kamida 50 kishi halok boʻlgan.

Koʻplab viloyatlarda namoyishlar boʻlib oʻtdi

Kecha xavfsizlik kuchlariga qilingan hujumga qarshi bir nechta viloyatda norozilik namoyishlari boʻlib oʻtdi.

Juma namozidan soʻng, Dimashq, Halab, Hama, Hums, Idlib, Daraa va Dayruzzor shaharlaridagi suriyaliklar yigʻilib, agʻdarilgan rejim kuchlariga qarshi olib borilayotgan operatsiyalarni qoʻllab-quvvatlovchi shiorlar bilan chiqish qilishdi.

Tartus va Latakiyada komendantlik soati uzaytirildi

6 mart kuni kechasi boshlangan Tartus va Latakiyadagi komendantlik soati uzaytirildi.

Fuqarolarga Tartusda soat 10:00 gacha, Latakiyada esa 09:00 gacha koʻchalarga chiqish taqiqlangan.

Suriya razvedkasidan «taslim boʻlish» chaqiriqlari

Suriya umumiy razvedka boshligʻi Anas Xattab ijtimoiy tarmoqlarda mamlakat xavfsizlik kuchlari Suriya xalqi xavfsizligini taъminlash, vaziyatni barqarorlashtirish va xavfsiz muhit yaratishga harakat qilayotganini taъkidladi. Uning soʻzlariga koʻra, agʻdarilgan rejim tarafdorlarining qurollarni tashlab, xavfsizlik organlariga taslim boʻlishdan boshqa choralari yoʻq.

Agʻdarilgan rejimning «Shabixa» etakchisi qoʻlga olindi

Suriya OAV maъlumotiga koʻra, qoʻllab-quvvatlovchilardan iborat «Xalq qoʻmitalari» nomli guruhning rahbari boʻlgan Yusuf Xarba dengizboʻyi hududida olib borilgan operatsiyalar davomida xavfsizlik kuchlari tomonidan qoʻlga olindi.

Uning yonidan granata va avtomat qurollari topilgan.

Oldingi kuni Bashar Asad rejimi tarafdorlari Latakiyaning Jabla tumaniga hujum uyushtirgani natijasida kamida 11 nafar xavfsizlik xizmati xodimi halok boʻlgan.