Netanyaxu Tramp bilan Gʻazodagi vaziyatni muhokama qilish uchun Vashingtonga keldi

Isroil Bosh vaziri Binyamin Netanyaxu AQSh prezidenti Donald Trampning taklifiga binoan Vashingtonga tashrif buyurdi. Netanyaxuning AQShga tashrifi davomida u Prezident Tramp bilan muhim muzokaralar oʻtkazishni rejalashtirgan.

Isroilning BMTdagi doimiy vakili Denni Danon, Merilend shtatidagi Endryu aviabazasida Netanyaxuni qutlab, boshqa rasmiylar bilan suratga tushdi. Danon izohida: “Men Bosh vazir Netanyaxuni Vashingtonda Prezident Tramp bilan uchrashish uchun qutlaganimdan mamnunman. Bu mamlakatlarimiz oʻrtasidagi chuqur ittifoqni mustahkamlaydi va hamkorlikni kengaytiradigan muhim muzokaralardir”, — dedi.

Netanyaxu, AQShga uchishidan oldin, XAMAS va Hizbullohga qarshi zarbalar “Yaqin Sharq qiyofasini” oʻzgartirganini taʻʻkidladi va qabul qilingan qarorlar "mintaqa xaritasini qayta tuzish" imkonini berganini aytdi. Shu bilan birga, Netanyaxu Tramp bilan yaqindan hamkorlik qilish orqali, bu xaritani yanada samaraliroq oʻzgartirishga ishonayotganini bildirdi.

Seshanba kuni Netanyaxu Oq uyda Trampning Yaqin Sharq boʻyicha maxsus vakili Stiv Vitkoff bilan uchrashishi va Prezident Tramp bilan muzokaralar oʻtkazishi kutilmoqda. Uchrashuvda Gʻazodagi vaziyat, mahbuslar masalasi va Eron siyosati kabi muhim mavzular muhokama qilinadi.