Eron va Saudiya Arabistoni har tomonlama hamkorlikni kuchaytirmoqchi

Eron prezidenti Masud Pezeshkian Saudiya Arabistoni valiahd shahzodasi va bosh vaziri Muhammad bin Salmon Ol Saud telefon orqali muloqot chogʻida ikki tomonlama hamkorlikni chuqurlashtirishga sodiq ekanliklarini bildirdilar. Bu haqda Eron prezidenti devoni bayonotida maʻʻlum qilindi.

Bayonotga koʻra, Eron prezidenti muhim ichki ishlar tufayli Islom hamkorlik tashkiloti va Arab Ligasining dushanba kuni Ar-Riyodda oʻtkazilgan navbatdan tashqari qoʻshma sammitida qatnasha olmasligini tushuntirgan. Uning oʻrniga tadbirda Eron tomonidan birinchi vitse-prezident Muhammad Rizo Orif vakillik qildi.

Masud Pezeshkian sammit Isroilning mintaqadagi harbiy amaliyotlari, Gʻazo sektori va Livanda davom etayotgan mojarolar kabi muammolarni hal etishda salmoqli natijalar berishiga ishonch bildirdi.

Eron prezidenti, shuningdek, oʻz mamlakati ikki tomonlama munosabatlarni yanada mustahkamlashga tayyorligini taʻʻkidladi, bu ikki etakchining turli sohalardagi hamkorlikni kengaytirishga intilishlariga javob beradi.

Saudiya Arabistoni valiahd shahzodasi, oʻz navbatida, Masud Pezeshkianga qoʻngʻiroq uchun minnatdorlik bildirib, Erondagi vaziyatni tushunishini bildirdi va Eron rahbariyatiga muvaffaqiyatlar tiladi.

Valiahd shahzoda ikki davlat oʻrtasidagi munosabatlar burilish pallasida ekanini taʻʻkidlab, ikki tomonlama munosabatlar barcha sohalarda maksimal darajaga koʻtarilishi va Ar-Riyodga tashrifi chogʻida Muhammad Rizo Orif bilan bu borada muzokaralar olib borilishiga umid bildirdi.

Ikki davlat rahbarlari yaqin kelajakda oʻzaro davlat tashriflarini amalga oshirishga tayyor ekanliklarini bildirdilar.

Saudiya Arabistoni va Eron 2023 yil aprelida etti yillik sovuqchilikdan soʻng Xitoy vositachiligida diplomatik munosabatlarni tikladi.