Britaniya tayyorgarligidan oʻtgan afgʻon elita “spetsnazi” askarlari vatanlariga deportatsiya qilinishi mumkin

Britaniya instruktorlari tomonidan tayyorlangan va hozirda Pokistonda boshpana olayotgan CF333 afgʻon elita maxsus kuchlari aʻʻzolari London Buyuk Britaniyaga kirishga ruxsat bermagani sababli Afgʻonistonga deportatsiya qilinishi mumkin. Bu haqda TASS BBC`ga tayanib xabar qildi.

Buyuk Britaniyaning ushbu “spetsnazchi”larni qabul qilishdan bosh tortishi “sharmandalik, [Britaniyaning] millat sifatida ikkiyuzlamachiligi yoki layoqatsizligining aksidir”, dedi Afgʻonistonda 12 yil xizmat qilgan Buyuk Britaniya Birlashgan kuchlarining sobiq qoʻmondoni Richard Berrons. "Bu xiyonat va ushbu xiyonatning badali biz bilan birga xizmat qilgan, oʻladigan yoki umrini qamoqda oʻtkazadigan odamlar boʻladi", - dedi Berrons.

2021 yilda sobiq bosh vazir Boris Jonson Britaniya parlamentida ushbu afgʻon maxsus kuchlarining xizmati “aql bovar qilmaydigan darajada muhim” ekanini aytib, Buyuk Britaniya “ularning xavfsiz chiqib ketishini taʻʻminlash uchun barcha zarur choralarni koʻrishini” taʻʻkidlagandi.

Pokistonda 1 noyabrdan buyon vizasiz va hujjatsiz xorijliklarni vatanlariga chiqarib yuborish kampaniyasi olib borilmoqda. Hozirgacha Pokistondan kamida 374 ming qochqin Afgʻonistonga qaytgan.

Pokiston muvaqqat hukumatiga koʻra, soʻnggi qirq yil ichida Jeneva konventsiyasi asosida mamlakatga Afgʻonistondan 4 milliondan ortiq qochqin kelgan, ulardan 1,7 millioni yashash hujjatlariga ega emas va deportatsiya qilinishi kerak.