Ashxobod aeroportida rus tilini bilmagan yoshlar qaytarib yuborilmoqda

Ashxobod aeroportida rus tilidagi savollarni tushunmagan va javob bera olmagan yoʻlovchilar, asosan yoshlar, barcha hujjatlari joyida boʻlishiga qaramasdan, qaytarib yuborilmoqda. Yoshlarni reyslarga chiqarmaslik holati Turkiyaga parvozlarda ham kuzatilmoqda.  

Turkmaniston poytaxti Ashxobod aeroportida Migratsiya xizmati Rossiyaga uchayotgan yoʻlovchilar, asosan yoshlarga rus tilida savol berib, tushunmagan va javob bera olmaganlarni, barcha hujjatlari joyida boʻlishiga qaramasdan, qaytarib yubormoqda.

turkmen.news manbalariga koʻra, 27 avgust kuni olti nafar yoshga Moskvaga uchuvchi samolyotga chiqishga ruxsat berilmagan. Rad etish sababi tushuntirilmagan. Manbalardan olingan maʻʻlumotlarga koʻra, «yuqoridan» qandaydir buyruq bor - yoshlarni Rossiyaga hech qanday yoʻl bilan kiritmaslik, ular Ukrainaga jang qilish uchun ketishi yoki Rossiyada noqonuniy ishlash uchun qolishi mumkinligidan qoʻrqishmoqda.

Xuddi shunday holat Turkiyaga parvozlarda ham kuzatilmoqda. «Xroniki Turkmenistana» maʻʻlumotlariga koʻra, 28 avgust kuni 60 ga yaqin odam migratsiya xizmati pasport nazoratidan oʻtkazmagani uchun Istanbulga ucha olmagan.

Soʻnggi yillarda Turkmaniston hukumati fuqarolarning chet elga chiqish qoidalarini sezilarli darajada qattiqlashtirdi, bir qator yangi talablar paydo boʻldi. Jumladan, Rossiyaga safar qilish uchun endilikda nafaqat taʻʻlim muassasasidan taklifnoma va harbiy muassasa (“voenkomat”)dan maʻʻlumotnoma, balki rus tili kurslarini tugatganligini tasdiqlovchi oʻquv markazlaridan birining sertifikati ham kerak.

Biroq odamlar kurslarni tamomlamay turib, 1500 manatga (taxminan 75 dollar) sertifikat sotib olib, tizimni chetlab oʻta boshlagan. Natijada aeroportlarda sertifikati boʻlganlarga ham rus tilida savollar berish boshlangan.

“Migratsiya xizmati xodimlari rus tilida savollar berishdi, yoʻlovchilar esa ularga javob berishlari kerak edi, - dedi yaqinda Ashxoboddan Moskvaga uchib kelgan manba. - Savollarni tushunmagan yoki javob bera olmaganlar qaytarib yuborildi".