Dunyo boʻylab Ramazon Hayiti qanday nishonlandi?

Musulmon mamlakatlar bu yilgi Ramazon Hayitini katta xursandchilik bilan qarshi oldi. Turli davlatlarda millionlab insonlar Hayit  namozida ishtirok etib, ezgulik va baraka tilab duo qildilar.  

Masalan, Afgʻoniston va Suriyada davlat rahbariyatining ishtirokida namoz oʻqildi. Yaponiyaning Tokio markaziy masjidida esa, namoz uch kun ketma-ket ado etildi. 

Muqaddas Ramazon Hayiti Qatar, Qozogʻiston, Qirgʻiziston, Pokiston, Gurjiston va Iroq – Kurdiston mintaqasida ham keng miqyosda nishonlandi. Masjidlarda namoz oʻqilib, xayriya tadbirlari oʻtkazildi. Falastinda musulmonlar Masjidul Aqsoda ibodat qilib, Yaratgandan tinchlik-osoyishtalik soʻrab duolar qildilar. 

Shuningdek, Turkiya Prezidenti Rajab Toyyib Erdoʻgʻan bayram munosabati bilan butun musulmon dunyosini tabrikladi. 

Saudiya Arabistoni maъlumotlariga koʻra, Ramazon oyida Makka va Madinadagi ikki muqaddas masjid – Masjidul-Harom va Masjidun-Nabaviy  122 286 712 musulmonni qabul qildi.  

Shuningdek, ushbu davrda 16 558 241 ziyoratchi umra ibodatini ado etdi. Masjidul-Haromda 75 573 928 musulmon namoz oʻqigan boʻlsa, Masjidun-Nabaviyda bu koʻrsatkich 30 154 543 kishini tashkil etdi.  

Saudiya Arabistoni Ramazon davomida ziyoratchilar uchun barcha sharoitlarni yaratganini va muqaddas ibodatlarni bajarish jarayoni xavfsiz va tartibli tashkil etilganini taъkidladi.