31.01.2025 15:42
224
Вашингтондаги авиаҳалокат: диспетчерлар етишмаган, вертолёт эса белгиланган баландликдан юқори учган – NYT
New York Times газетаси АҚШ Фуқаро авиацияси федерал бошқармаси (FAA) дастлабки ҳисоботига таяниб, 29 январь куни Вашингтонда American Airlines самолёти ва Black Hawk ҳарбий вертолёти тўқнашган вақтда Рональд Рейган номидаги аэропортда диспетчерлар етишмаганини маълум қилди.
Ҳалокат сабаблари ўрганилганда диспетчерлар етишмовчилиги, яъни аэропортдаги диспетчерлар сони кун вақти ва трафик ҳажмига мос келмагани аниқланди.
Бир диспетчер икки вазифани бажарган – аэропорт ҳудудида вертолётлар ҳаракатини назорат қилувчи диспетчер самолётларга учиш ва қўниш бўйича ҳам кўрсатмалар берган. Одатда, бу вазифалар икки диспетчер ўртасида тақсимланиши керак.
Вертолёт белгиланган баландликдан юқорида учган – Black Hawk вертолёти 91 метр баландликка чиқиб кетган, қоидага кўра 61 метрдан ошмаслиги керак эди.
Вертолёт учувчиси самолётни кўрган, лекин йўналишга амал қилмаган – Black Hawk экипажи American Airlines самолётини кўраётганини диспетчерга билдирган, бироқ белгиланган йўналишни бузган.
67 киши - 60 йўловчи ва CRJ700 экипажи, шунингдек, вертолётнинг 3 аъзоси ҳам ҳалок бўлди. Шу кунгача қидирув ишлари давом этмоқда – Потомак дарёсида 50 дан ортиқ жасад топилди.
Самолётнинг маълумот ёзувчи қора қутилари топилган ва экспертизага юборилган.
Мутахассислар ҳодисанинг аниқ сабабларини ўрганишда давом этмоқда.