Ғазода уруш бошланган 2023 йил 7 октябридан буён АҚШ Исроилга ҳаво ва денгиз орқали 50 минг тоннадан ортиқ қурол-яроғ етказиб берди. Исроил Мудофаа вазирлиги маълумотларига кўра, 500 та парвоз ва 107 та денгиз жўнатмалари орқали 50 минг тоннадан ортиқ ҳарбий техника ва техника етказиб берилган.
Суданда ҳукумат армияси ва Тезкор ҳаракат кучлари ўртасидаги тўқнашувлар бошланганига 500 кун бўлди. Бу давр мобайнида мамлакат ҳар томонлама таназзулга юз тутди, 19 мингга яқин инсон ҳалок бўлди, 10 миллиондан зиёж киши уй-жойларини ташлаб кетишга мажбур бўлди.
Покистон шимоли-ғарбида “Белужистон озодлик армияси” бўлгинчи террор ташкилоти жангарилари йўлдаги тинч аҳолига, шунингдек, полиция бўлимлари, ҳарбий база ва темир йўлга ҳужум қилди. Ҳудудда аксилтеррор амалиёти ўтказилди. Сўнгги маълумотларга кўра, айирмачилар билан тўқнашув оқибатида энг камида 73 киши ҳалок бўлган. Уларнинг 38 нафари тинч аҳоли вакиллари, 14 нафари ҳарбий ва полициячилар, 21 нафари жангарилардир.
Нигерия пойтахти Абужада Эрон томонидан қўллаб-қувватланувчи шиа гуруҳи ҳужуми оқибатида камида икки ҳуқуқ-тартибот ходими ҳалок бўлди, яна уч нафари ҳушсиз ҳолда топилди.
Ироқнинг Карбало шаҳрида Имом Ҳусайн вафотининг қирқинчи кунида нишонланадиган Арбаин маросимини ўтказиб қайтаётган покистонлик шиаларнинг учта автобуси ҳалокатга учради. ЙТҲларда камида 38 киши ҳалок бўлди, ўнлаб зиёратчилар жароҳатланди.
ҲАМАС билан уруш бошланганига қарийб 11 ой бўлди. Исроил раҳбарлари Ғазо секторига ҳужумни шиддатли тарзда давом эттираётганига қарамасдан, урушнинг охири кўринмайди, аксинча, янада кенгроқ тўқнашувларга айланиш аломатлари кўриняпти, мамлакат иқтисодиёти эса зўриқмоқда. Уруш бошланганидан бери 46 мингга яқин корхона ёпилди, уларнинг 75 фоизи кичик бизнес вакиллари.
Исроил Ғазо секторида босқинчилик ва қирғинбарот урушини бошлаганига 325 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.
Украина қуролли кучларининг учувчисиз учоқлари Саратов ва Энгельсдаги кўп қаватли турар-жой биноларига ҳужум қилди, деди Саратов вилояти губернатори Роман Бусаргин. Шунингдек, Энгельс туманидаги Прибрежний қишлоғида яна тўртта хусусий уй зарар кўрди. Ҳужумлар натижасида бир киши оғир яраланган.
Франция ҳукумати Телеграм асосчиси Павел Дуровни ҳибсда сақлаш муддатини 96 соатгача (4 кун) узайтирди. Дуров фирибгарлик, гиёҳванд моддалар савдоси, кибербуллинг, уюшган жиноятчилик ва терроризм ташвиқоти каби жиноятларда гумонланмоқда. Телеграм ушбу айбларни рад этди.
Россия Савдо-саноат палатаси вице-президенти Елена Дибова НТВ телеканалига берган интервьюсида мамлакатдаги ҳарбий заводларда ишлайдиган одам йўқлигини таъкидлаб, хизмат кўрсатиш, жумладан, курьерлик ва таксичиликни тақиқлаб, ушбу соҳаларда ишлайдиганларни ҳарбий заводларга жўнатишни таклиф қилди.